Velotour Gym Fit Frauen

Velotour Gym Fit Fraue

 

Uf em Johresprogramm stoht am 18.05.2017 Velotour nur bei schönem Wetter und süsch «Spielabend» i dr Turnhalle.

Jä was wott das Wätter etz, am Mäntig hets gheisse es rägnet am Donnsti ganz fescht und am Zischtig isch das Wätter immer no aktuell gsi.  Aaaber vom Mittwuch ewäg isch aues nüm so tragisch gsi, s Meteo het grüens Liecht gä. So hei sech de am Donnsti obe am haubi sibni 10 Fraue mit de Velo’s troffe. Übersetzt seit me dene Velo’s: 1 Bike, 3 Citiybike’s und 6 E-Bike’s.

 

S’Ursi Ziegler hets Zepter überno und het mit üs e Tour durs üssere Wasseramt in Agriff gno. Dr Schwarzwäg z’türab uf Däredinge, när richtig Subige über dä nöi Velowäg – de uf Etzike, dört hei mer d Hauptstroos überquert und si de Querfeldein zum Inkwylersee gfahre. Es isch schön gmüetlech gsy bis dört hi.

 

Mir hei dört e Pause gmacht und es het Bänk und Tische zum benütze gha. S Ursi Ziegler het e riesigi Täsche i ihrem Velochörbli gha. Niemer het sech über das Gedanke gmacht. Aber s’ Ursi wär nid s’Ursi – si het us dere Täsche es mega feins Apero zauberet – feini Stückli Chäs – chüstigi Salamettli-Redli – knusprigs Holzofebrot und es Glesly «Glottertaler»-Rosewy ---- mmhhh isch das aues mega fein gsy….  Merci Ursi!

Mir hei das Apero gnosse, hei chli gschnäderet, de Änte zuegluegt und eifach die schöni Umgäbig uf üs lo würke.

 

Nach dere Pause hei mer no einisch i d’Pedal drückt und si über Fäld und Wiese gfahre. Einisch links abbiege, de wider rächts abbiege, när dr Hoger uf, de wider Nitzi fahre, dört umne Huusegge und do wider e scharfi Kuve, so simer gfahre bis uf Horriwil und dört si mer de is Restaurant Sunne go Y-Chehre…. Säubverständlich bruuchts nach so ne re Tour e Stärkig. Fitnesställer, Sparguravioli oder Nüdeli mit Eierschwümmli Sauce, jedes het das bstöut wos am liebste gha het. Zum Abschluss no es süesses Bettmümpfeli das ghört doch zum ne feine Kafi.

 

Wär etz dänkt die hei jo nume Aperölet und gässe – dä dänkt fausch…. Mir hei de glich es paar Kilometer tschaupet – chli Hoger uf und Hoger ab und si so lang ungerwägs gsi, as mer de glich au no liecht bruucht hei für hei.

 

Es isch e coole Obe gsi. Es grosses Merci as Ursi Ziegler fürs organisiere.

 

Ursi Hofer